बीडच्या शिक्षणक्षेत्रातील गणेश माध्यमिक विद्यालय तांबवा येथील गाजलेल्या लाचलुचपत प्रकरणातील सर्व आरोपींवर आरोप निश्चित!
केज : बीड जिल्ह्यातील गणेश माध्यमिक विद्यालय तांबवा येथील शिक्षण क्षेत्रात खळबळ उडवून देणाऱ्या बहुचर्चित लाचलुचपत प्रकरणात न्यायालयीन प्रक्रियेला आता महत्त्वाचे वळण मिळाले असून, जिल्हा व सत्र न्यायालय, केज (अतिरिक्त सत्र न्यायाधीश – १) यांच्या दालनात सुरु असलेल्या विशेष खटला क्र. ०९/२०२४ (Spl. Case/0000009/2024) मधील सर्व आरोपींवर अखेर आरोप निश्चित (Framing of Charges) करण्यात आले आहेत. या बाबतची थोडक्यात माहिती अशी की, केज पोलीस ठाण्यातील दाखल एफ.आय.आर. क्रमांक १००/२०२२ नुसार भ्रष्टाचार प्रतिबंधक कायद्याअंतर्गत (Prevention of Corruption Act – Sections 7, 7-A, 12) खालील आरोपींवर प्रस्तुत खटला चालवला जात आहे: या बहुचर्चित खटल्यातील आरोपी १) अशोक हरिभाऊ चाटे, २) उद्धव माणिकराव कराड, ३) अनंत बाबूराव हांगे, आणि ४) दत्तात्रय सूर्यभान धस: या चार आरोपीवर लाचलुचपतचे आरोप आहेत. दिनांक ०५ ऑक्टोबर २०२६ रोजी झालेल्या सुनावणी दरम्यान:सरकारी अभियोक्ता (A.P.P.), आरोपी आणि आरोपींचे वकील न्यायालयात हजर होते. आरोपी क्रमांक २ (उद्धव कराड) यांच्या वतीने ॲड. एस. एस. देशपांडे यांचे वकीलपत्र दाखल करण्यात आले. युक्तिवाद: दोषारोप निश्चितीपूर्वी सरकारी पक्ष व आरोपी पक्ष या दोन्ही बाजूंचा युक्तिवाद न्यायाधीशांनी सविस्तर ऐकून घेतला. आरोप निश्चिती: दोन्ही बाजूंचे म्हणणे ऐकून घेतल्यानंतर मा. न्यायालयाने भ्रष्टाचार प्रतिबंधक कायद्याच्या संबंधित कलमांनुसार आरोपींवर कायदेशीर दोषारोप (Charges) निश्चित केले आहेत.आरोपींचे निवेदन: या सुनावणीदरम्यान आरोपींच्या वतीने लेखी निवेदन देखील न्यायालयात सादर करण्यात आले. पुढील सुनावणी आणि साक्षीदारांची यादी: या प्रकरणात आता प्रत्यक्ष पुराव्यांची आणि साक्षीदारांच्या तपासणीची प्रक्रिया सुरू होणार आहे. न्यायालयाच्या आदेशानुसार पुढील सुनावणी २५ नोव्हेंबर २०२६ रोजी होणार असून, त्या दिवशी साक्षीदारांची यादी (List of Witness) न्यायालयात सादर केली जाणार आहे. शिक्षण क्षेत्रातील या मोठ्या लाचलुचपत प्रकरणामुळे संपूर्ण बीड जिल्ह्यात मोठी खळबळ उडाली होती. आता न्यायालयात दोषारोप निश्चित झाल्याने या खटल्याच्या अंतिम निकालाकडे संपूर्ण जिल्ह्याचे लक्ष लागले आहे”
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
