धनादेश न वटल्याप्रकरणी बीडच्या आरोपीला १ वर्ष कारावास आणि १० लाखांचा दंड. ​अंबाजोगाई सहकारी साखर कारखान्याची फसवणूक भोवली; न्यायालयाने सुनावली कडक शिक्षा.

धनादेश न वटल्याप्रकरणी बीडच्या आरोपीला १ वर्ष कारावास आणि १० लाखांचा दंड. ​अंबाजोगाई सहकारी साखर कारखान्याची फसवणूक भोवली; न्यायालयाने सुनावली कडक शिक्षा.

​अंबाजोगाई/ प्रतिनिधी: ऊस तोडणी आणि वाहतुकीच्या करारापोटी घेतलेली उचल न फेडता, दिलेला धनादेश (चेक) अनादरित झाल्याप्रकरणी अंबाजोगाई येथील न्यायालयाने मोठा निकाल दिला आहे. आरोपी विलास श्रीमंत भोरे (रा. वाढवणा, ता. जि. बीड) याला १ वर्ष सश्रम कारावास आणि १० लाख रुपये दंडाची शिक्षा सुनावण्यात आली आहे. दंड न भरल्यास अतिरिक्त ३ महिने कारावास भोगावा लागणार आहे. याबाबतची सविस्तर माहिती अशी की, ​अंबाजोगाई सहकारी साखर कारखान्याने गळीत हंगाम २००८-०९ साठी ऊस तोडणी व वाहतूक मुकादमांशी करार करण्यास सुरुवात केली होती. यावेळी आरोपी विलास भोरे याने स्वतः वाहन मालक असल्याचे सांगून ३ ऑक्टोबर २००८ रोजी कारखान्याशी करार केला. या करारापोटी त्याने कारखान्याकडून ३ लाख ५० हजार रुपये उचल घेतली होती. ​हंगाम संपल्यानंतर आरोपीने केवळ ९० हजार रुपयांची परतफेड केली. उर्वरित २ लाख ६० हजार रुपये मुद्दल आणि त्यावरील २ लाख ३४ हजार रुपये व्याज अशी एकूण ४ लाख ९४ हजार रुपयांची थकबाकी त्याच्याकडे शिल्लक होती. ही रक्कम देण्यासाठी आरोपीने ‘अंबाजोगाई पीपल्स को-ऑपरेटिव्ह बँक’चा धनादेश (क्र. ६२६३२७) कारखान्याला दिला होता. ​न्यायालयीन लढाई आणि निकाल ​कारखान्याने सदर धनादेश बँकेत भरला असता, आरोपीच्या खात्यात पुरेशी रक्कम नसल्याने १४ डिसेंबर २०१३ रोजी तो ‘बाउन्स’ झाला. कारखान्याचे कायदेशीर सल्लागार ॲड. प्रवीण मेटे यांच्यामार्फत नोटीस बजावूनही आरोपीने पैसे न दिल्याने न्यायालयात खटला (S.S.C. क्र. १००/२०१४) दाखल करण्यात आला. ​या प्रकरणात कारखान्याच्या वतीने लालासाहेब इंगळे आणि गोवर्धन पवार यांची साक्ष महत्त्वाची ठरली. फिर्यादी पक्षाचा लेखी व तोंडी पुरावा तसेच ॲड. प्रवीण मेटे यांचा युक्तिवाद ग्राह्य धरून, दिवाणी न्यायाधीश (वरिष्ठ स्तर) यांनी ५ मे २०२६ रोजी हा ऐतिहासिक निकाल दिला. ​शिक्षेचे स्वरूप: ​कारावास: १ वर्ष. ​दंड: १० लाख रुपये (ही रक्कम फिर्यादी कारखान्याला नुकसान भरपाई म्हणून द्यायची आहे). ​दंड न भरल्यास: अतिरिक्त ३ महिने कारावास. ​या प्रकरणात कारखान्याच्या वतीने लालासाहेब इंगळे, गोवर्धन मनोहर पवार आणि विधीज्ञ प्रवीण मेटे यांनी यशस्वीरीत्या काम पाहिले.