केज न्यायालयात लाचप्रकरणातील आरोपी क्र. ४ चा हजेरीमाफीचा अर्ज ना मंजूर; पकड वॉरंट जारी!
केज /विशेष प्रतिनिधी: केज येथील जिल्हा व अतिरिक्त सत्र न्यायालयात सुरू असलेल्या लाचलुचपत प्रतिबंधक विभागाच्या (ACB) विशेष खटल्यामध्ये परवा एक महत्त्वपूर्ण घडामोड झाली आहे. न्यायालयाने आरोपी क्रमांक ४ चा हजेरीमाफीचा अर्ज फेटाळून लावत त्याच्याविरुद्ध गैरजामीनपात्र पकड वॉरंट (Non-Bailable Warrant / N.B.W.) जारी करण्याचे आदेश पारित केले आहेत. काय आहे प्रकरण? गजानन शिक्षण प्रसारक मंडळ, तांबवा (ता. केज) येथील निवृत्त शिक्षकाचे थकलेले वेतन व सेवापूर्तीचे लाभ देण्याच्या मोबदल्यात लाचेची मागणी केल्याप्रकरणी महाराष्ट्र शासन विरुद्ध अशोक हरिभाऊ चाटे व इतर (Spl. Case No. 0000009/2024, CNR No: MHBI180001392024) असा विशेष खटला न्यायालयात सुरू आहे. न्यायालयातील घटनाक्रम: दिनांक २१ सप्टेंबर २०२६ रोजी या खटल्याची सुनावणी जिल्हा न्यायाधीश-१ व अतिरिक्त सत्र न्यायाधीश, केज यांच्या न्यायालयात पार पडली. सुनावणीदरम्यान सरकारी अभियोक्ता आणि आरोपींचे वकील उपस्थित होते. या वेळी आरोपी क्रमांक ४ च्या वतीने (१९/ड अन्वये) आजच्या सुनावणीस गैरहजर राहून हजेरीमाफी मिळण्यासाठी अर्ज दाखल करण्यात आला होता. परंतु, न्यायालयाने सदर अर्ज अमान्य (ना मंजूर) केला. न्यायालयाने गंभीर दखल घेत निशाणी १ वर आरोपी क्रमांक ४ विरुद्ध पकड वॉरंट जारी करण्याचा आदेश जारी केला आहे. पुढील सुनावणी २८ सप्टेंबरला– न्यायालयाने आरोपी क्र. ४ ला पकड वॉरंट बजावण्याचे आदेश दिल्यानंतर आता या विशेष खटल्याची पुढील सुनावणी २८ सप्टेंबर २०२६ रोजी होणार आहे.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
