​केज येथील व्यवसाय शिक्षक सूर्यकांत वाघमारे यांची गळफास लावून आत्महत्या; केज परिसरात सर्वत्र हळहळ.

​केज येथील व्यवसाय शिक्षक सूर्यकांत वाघमारे यांची गळफास लावून आत्महत्या; केज परिसरात सर्वत्र हळहळ.

​केज/प्रतिनिधी: केज शहरात वास्तव्यास असलेल्या एका उच्चशिक्षित व मनमिळावू शिक्षकाने चिंचोली फाट्याजवळ लिंबाच्या झाडाला गळफास लावून आपली जीवनयात्रा संपवल्याची धक्कादायक व अत्यंत दुर्दैवी घटना मंगळवारी रात्री घडली. सूर्यकांत बाळासाहेब वाघमारे (वय ४१, रा. लहुरी, ह.मु. शाहूनगर, केज) असे या दुर्दैवी शिक्षकाचे नाव आहे. या घटनेमुळे शिक्षण क्षेत्रासह केज शहर व परिसरात प्रचंड खळबळ उडाली असून, सर्व स्तरांतून तीव्र हळहळ व्यक्त केली जात आहे. ​मिळालेल्या प्राथमिक माहितीनुसार, सूर्यकांत वाघमारे हे केज तालुक्यातील कुंभेफळ येथील सिद्धी विनायक विद्यालयात ‘व्यवसाय शिक्षक’ म्हणून कार्यरत होते. मंगळवार, दिनांक ९ जून २०२६ रोजी रात्री ११:०० वाजण्याच्या सुमारास केज-कळंब रस्त्यावरील चिंचोली फाट्या नजीक असलेल्या एका शेतकऱ्याच्या शेतातील लिंबाच्या झाडाला त्यांनी दोरीच्या सहाय्याने गळफास लावला. मात्र, त्यांच्या या टोकाच्या पावलामागचे नेमके कारण काय होते, हे अद्याप समजू शकलेले नाही. ​@पोलीस प्रशासनाकडून तात्काळ पंचनामा ​–या घटनेची माहिती केज पोलीस ठाण्याचे पोलीस निरीक्षक स्वप्निल उनवणे यांना मिळताच, त्यांनी तातडीने पावले उचलली. त्यांच्या मार्गदर्शनाखाली सहाय्यक पोलीस उपनिरीक्षक राजू वाघमारे व बीट अंमलदार हेड कॉन्स्टेबल त्रिंबक सोपने यांनी घटनास्थळी धाव घेतली. पोलिसांनी घटनास्थळाचा रितसर पंचनामा करून मृतदेह उत्तरीय तपासणीसाठी (Post-Mortem) केज येथील उपजिल्हा रुग्णालयात पाठवून दिला. या घटनेचा पुढील तपास केज पोलीस अत्यंत गांभीर्याने करत आहेत. ​सामाजिक व शैक्षणिक क्षेत्रात मोठी पोकळी ​मृत सूर्यकांत वाघमारे हे अत्यंत मनमिळावू, कष्टाळू आणि प्रेमळ स्वभावाचे होते. शिक्षक म्हणून काम करताना त्यांनी विद्यार्थ्यांमध्ये आणि समाजात आपली एक वेगळी ओळख निर्माण केली होती. सामाजिक व शैक्षणिक क्षेत्रामध्ये त्यांनी केलेले कार्य उल्लेखनीय होते. सदरील शिक्षक शासनाला सहकार्य म्हणून जनगणनेचे काम देखील करत होते. त्यांच्या याच चांगल्या स्वभावामुळे केज शहर व परिसरात त्यांचा दांडगा जनसंपर्क आणि मोठा मित्रपरिवार होता. त्यांच्या अकस्मात जाण्याने त्यांच्या मित्रपरिवाराला व शिक्षण क्षेत्राला मोठा धक्का बसला आहे. ​त्यांच्या पश्चात आई-वडील, तीन भाऊ, पत्नी आणि दोन मुले असा मोठा आणि हसता-खेळता परिवार आहे. एका जबाबदार आणि सुविद्य कुटुंबप्रमुखाने असे अचानक टोकाचे पाऊल उचलल्यामुळे वाघमारे कुटुंबावर दुःखाचा डोंगर कोसळला आहे.