​महाराष्ट्र राज्य महिला आयोगाच्या अध्यक्षपदी ‘लेडी सुपरकॉप’ मीरा बोरवणकर यांची नियुक्ती; सौ. रत्नमाला मुंडे यांच्या मागणी शिफारसीची शासनाकडून दखल.

​महाराष्ट्र राज्य महिला आयोगाच्या अध्यक्षपदी ‘लेडी सुपरकॉप’ मीरा बोरवणकर यांची नियुक्ती; सौ. रत्नमाला मुंडे यांच्या मागणी शिफारसीची शासनाकडून दखल.

​मुंबई/केज: राज्यातील महिलांच्या सुरक्षिततेचा आणि हक्कांचा प्रश्न ऐरणीवर असताना, महाराष्ट्र राज्य महिला आयोगाच्या रिक्त असलेल्या अध्यक्षपदावर अखेर निवृत्त आयपीएस अधिकारी मीरा बोरवणकर यांची नियुक्ती करण्यात आली आहे. ‘लेडी सुपरकॉप’ म्हणून ओळखल्या जाणाऱ्या बोरवणकर यांच्या निवडीमुळे महिला आयोगाला एक खंबीर आणि अनुभवी नेतृत्व मिळाले असून, या निर्णयाचे सर्व स्तरांतून स्वागत होत आहे. ​रत्नमाला मुंडे यांच्या पाठपुराव्याला यश. महाराष्ट्र राज्य महिला आयोगाच्या माजी अध्यक्षा रूपाली चाकणकर यांच्या राजीनाम्यानंतर हे पद रिक्त झाले होते. अशा महत्त्वाच्या पदावर कोणत्याही राजकीय व्यक्तीची वर्णी न लावता, एका कर्तव्यदक्ष आणि अनुभवी माजी पोलीस अधिकाऱ्याची नियुक्ती करावी, अशी आग्रही मागणी शिवसेना महिला आघाडीच्या संपर्कप्रमुख सौ. रत्नमाला मुंडे यांनी विविध वृत्तपत्रातून बातम्या व शासनाला दिलेल्या पत्रातून केली होती. बोरवणकर यांच्या नावाचा जाहीर प्रस्ताव मांडताना रत्नमाला मुंडे यांनी म्हटले होते की, महिलांवरील अत्याचार रोखण्यासाठी आणि पीडितांना खऱ्या अर्थाने न्याय मिळवून देण्यासाठी मीरा बोरवणकर यांच्यासारख्या ‘निर्भिड आणि कणखर’ नेतृत्वाची गरज आहे. राज्य शासनाने या मागणीची गांभीर्याने दखल घेत आज ४ मे २०२६ रोजी बोरवणकर यांच्या नियुक्तीवर शिक्कामोर्तब केल्या मुळे शिवसेनेचा संपर्कप्रमुख सौ रत्नमाला मुंडे यांनी शासनाचे तसेच  नवनियुक्त महिला आयोगाच्या अध्यक्षा मीरा बोरवणकर यांचे विशेष अभिनंदन केले आहे.

मीरा बोरवणकर या १९८१ च्या बॅचच्या महाराष्ट्र कॅडरच्या पहिल्या महिला आयपीएस अधिकारी आहेत. आपल्या प्रदीर्घ कारकिर्दीत त्यांनी अनेक गुंतागुंतीचे गुन्हे उघडकीस आणले असून, पोलीस दलात त्यांनी अत्यंत कडक शिस्तीच्या अधिकारी म्हणून ठसा उमटवला आहे. विशेषतः महिला आणि बालकांवरील अत्याचाराच्या प्रकरणांत त्यांनी घेतलेली कठोर भूमिका संपूर्ण महाराष्ट्राने पाहिली आहे. त्यांच्या याच अनुभवाचा फायदा आता राज्य महिला आयोगाला होणार आहे.या ​निवडीचे महत्त्वाचे मुद्दे खालील प्रमाणे आहेत. ​अध्यक्ष: मीरा बोरवणकर (निवृत्त आयपीएस अधिकारी). ​उद्देश: महिलांवरील अत्याचार रोखणे, महिलांचे हक्क जपणे आणि त्यांचे सक्षमीकरण करणे. ​कार्यकाळ: सामान्यतः राज्य महिला आयोगाच्या अध्यक्षांचा कार्यकाळ ३ वर्षांचा असतो. ​आयोगाची रचना: अध्यक्ष, ६ बिगर-शासकीय सदस्य, सदस्य-सचिव आणि पोलीस महासंचालक यांचा यात समावेश असतो. मीरा बोरवणकर सारख्या विशेष व्यक्तिमत्त्वाच्या सेवानिवृत्त अधिकारी महिलेची महिला आयोगाच्या अध्यक्षपदी निवड झाल्यामुळे राज्यातील तमाम ​महिलांमध्ये आशेचे वातावरण निर्माण झाले आहे. राजकारणापेक्षा अनुभवाला प्राधान्य देऊन करण्यात आलेल्या या नियुक्तीमुळे राज्यातील महिलांच्या प्रलंबित प्रश्नांना गती मिळण्याची अपेक्षा व्यक्त केली जात आहे. कोणत्याही दबावाखाली न येता पीडितांना न्याय मिळवून देण्याचे मोठे आव्हान आता बोरवणकर यांच्यासमोर असणार आहे. महिला आयोगाच्या पूर्वीच्या भ्रष्ट सदस्यांची तात्काळ हकालपट्टी करावी अशी ही मागणी सौ रत्नमला मुंडे यांनी याप्रसंगी केली आहे.​सौ. रत्नमाला मुंडे यांनी केलेल्या या यशस्वी शिफारसीबद्दल आणि शासनाच्या सकारात्मक निर्णयाबद्दल महिला वर्गातून समाधान व्यक्त होत आहे.