पाठलाग न्यूज स्पेशल: केज तालुक्यात गुन्हेगारीचा ‘पाठलाग’; मटका किंग जेरबंद, तर लाखोंची अवैध दारू जप्त!
प्रतिनिधी/ क्राईम प्रतिनिधी : केज शहर आणि परिसरात गेल्या काही काळापासून गुन्हेगारीने चांगलेच पाय पसरले असून, अवैध धंद्यांनी सर्वसामान्यांचे जगणे कठीण केले आहे. मात्र, आता पोलीस आणि प्रशासनाने या गुन्हेगारांचा ‘पाठलाग’ सुरू केला आहे. गेल्या २४ तासांत झालेल्या दोन मोठ्या कारवायांनी केजमधील गुन्हेगारी विश्वात मोठी खळबळ उडाली आहे. दहा गुन्हे दाखल असलेला मटका चालक ‘हर्सूल’मध्ये रवाना अनेक वर्षांपासून केज तालुक्यात मटक्याचे जाळे पसरवणारा गणेश सुधीर खराडे (वय ३५, रा. केज) याच्यावर अखेर कायद्याचा बडगा उगारण्यात आला आहे. खराडे याच्यावर मारामारी आणि धमकावण्यासारखे १० गंभीर गुन्हे दाखल होते. केजच्या उपअधीक्षकांनी पाठवलेल्या अहवालावर जिल्हाधिकाऱ्यांनी शिक्कामोर्तब करताच,बीड स्थानिक गुन्हे शाखेने (LCB) त्याला अटक केली.त्याची रवानगी आता औरंगाबादच्या हर्सूल कारागृहात करण्यात आली असून, यामुळे केजमधील अवैध मटका व्यवसायाला मोठा धक्का बसला आहे.
तर, दुसरीकडे,कळंब-अंबाजोगाई रोडवर राज्य उत्पादन शुल्क विभागाने सिनेमॅटिक स्टाईलने “पाठलाग’ करून अवैध दारूची तस्करी उघडकीस आणली. युसूफ वडगाव शिवारात एका स्विफ्ट कारमधून (MH 14 EP 3741) होणारी तस्करी रोखण्यात आली. या कारवाईत पोलिसांनी: बनावट व्हिस्की आणि देशी दारूच्या हजारो बाटल्या. महागडे आयफोन आणि सॅमसंग झेड फ्लिप फोन. असा एकूण ७ लाख ३६ हजार रुपयांचा मुद्देमाल जप्त केला आहे. या प्रकरणी रेवण नखाते (धारूर) आणि गणेश धुमाळ (बार्शी) यांना बेड्या ठोकण्यात आल्या आहेत. एकाच वेळी उघडकीस आलेले हे दोन मोठे प्रकार केज परिसरातील भयावह वास्तव समोर आणतात. मटका, जुगार आणि अवैध दारूच्या तस्करीमुळे शहराची शांतता धोक्यात आली होती. मात्र, प्रशासनाच्या या आक्रमक पवित्र्यामुळे गुन्हेगारांचे धाबे दणाणले आहेत. नागरिकांनी या कारवाईचे स्वागत केले असून, आता इतरही अवैध धंद्यांचा असाच ‘पाठलाग’ व्हावा, अशी मागणी होत आहे.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
