नागपूरमधील बोगस शिक्षक भरती घोटाळा प्रकरण आणि बोगस शालार्थ आयडी घोटाळा प्रकरणात मोठी माहिती समोर आली आहे. या प्रकरणात ६८० शिक्षकांवर अटकेची टांगती तलवार आहे. सायबर पोलिसांकडून आतापर्यंत तपासलेल्या १ हजार ८० आयडीमधून ६८० शिक्षकांचे आयडी बोगस असल्याची धक्कादायक माहिती समोर आल्याने बोगस आयडी द्वारे नोकरी मिळवलेल्या शिक्षकांमध्ये एकच खळबळ उडाली आहे. या ६८० बोगस शिक्षकांवर अटकेची टांगती तलवार आहे. सायबर क्राईम ब्रँचने आपल्या तपासात संबंधित शिक्षकांची बोगसगिरी सिद्ध केल्यामुळे या सर्वांना पोलिसांकडून अटक करण्यात येणार असल्याचे संकेत एसआयटीकडून मिळाले आहेत. त्यामुळे राज्याच्या शैक्षणिक क्षेत्रात एकच खळबळ उडाली आहे. नागपूर विभागातील शालार्थ आयडी घोटाळ्यासारखीच संपूर्ण राज्यात अशीच परिस्थिती असल्याचे स्पष्ट झाल्यामुळे राज्यातील अनेक जिल्ह्यातील संस्थाचालक व बोगस शालार्थ आयडी घेतलेल्या शिक्षकांची आता पाचावर धारण बसली असलेचे दिसून येत आहे. सर्वप्रथम नागपूर जिल्ह्यात मागील ५ महिन्यांपूर्वी हे प्रकरण उघडकीस आले. या प्रकरणाचा सध्या पोलिसांकडून तपास सुरू आहे. उपसंचालक उल्हास नरड यांच्या अध्यक्षतेखाली असलेल्या समितीने विभागातील २३३ शिक्षकांचे शालार्थ आयडी बनावट असल्याचा अहवाल सादर केला होता. त्या आधारेच सायबर पोलिसांकडे तक्रार देण्यात आली होती. १२ मार्चला सायबर पोलिसांकडे या प्रकरणात पहिल्यांदा गुन्हा दाखल झाला होता.सायबर पोलिसांकडून या प्रकरणाचा कसून तपास सुरू असताना एक एकाची नावं समोर येऊ लागली. सायबर पोलिसांनी केलेल्या तपासातून नागपूर विभागातील एकूण शिक्षकांपैकी १ हजार ८० शिक्षकांचे आयडी बोगस असल्याची माहिती समोर आली होती. त्यानंतर शिक्षण विभागाकडून या सर्व शिक्षकांची चौकशी सुरू करण्यात आली. शालार्थ घोटाळ्यातील मुख्य आरोपी निलेश वाघमारेला पोलिसांनी अटक केली. पण या प्रकरणातील आरोपी माजी उपसंचालक सतीश मेंढे अद्यापही फरार आहे. पोलिस त्याचा शोध घेत आहेत. सतीश मेंढेला अटक करण्याबाबत पोलिसांकडून मात्र कुठलेही प्रयत्न होत नसल्याचे दिसून येते. तिन्ही न्यायालयांनी सतीश मेंढेचा अटकपूर्व जामीन अर्ज फेटाळला होता. असे असताना देखील त्याला अटक होत नसल्यामुळे अटकेबाबत शाशंकता व्यक्त होत आहे. या प्ररणाच्या तपासातून ६३३ शिक्षकांची नियुक्ती बोगस असल्याची माहिती समोर आली आहे. या प्रकरणाचा तपास करत असताना गेल्या पाच महिन्यांत पोलिसांनी वरिष्ठ अधिकारी, शिक्षणाधिकारी, कर्मचारी, मुख्याध्यापक, शिक्षकांना अटक केली. पण अद्यापही शिक्षकांवरील संकट संपलेले नाही. आर्थिक व्यवहार करत बनावट कागदपत्रांच्या सहाय्याने शिक्षक म्हणून नियुक्ती दर्शवत अधिकाऱ्यांच्या मदतीने ६८० शिक्षकांनी शालार्थ आयडी मिळवल्याचे सायबर पोलिसांच्या तपासात उघड झाले आहे. या सर्वच शिक्षकांची अटकेची कार्यवाही जवळ जवळ निश्चित झाली आहे. सायबर क्राईम ब्रँच ने उघड केलेल्या बोगस शालार्थ आयडी घोटाळा प्रकरणाच्या एसआयटी चौकशीत धक्कादायक माहिती समोर आलीय.. सायबर पोलिसांनी तपासलेल्या 1 हजार 80 पैकी 680 शिक्षकांचे शालार्थ आयडी बोगस असल्याचं आढळून आलंय, त्यामुळे सर्वच बोगस शिक्षकांवर गुन्हा दाखल करुन अटक करण्यात येणार असल्याचे संकेत खुद सरकारनेच दिले आहेत. त्यामुळे बोगस शालार्थ आयडी घेऊन नोकरीवर कार्यरत असलेल्या शिक्षकांचे धाबे दणाणले आहेत.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
