प्रतिनिधी/ केज : केज अंबाजोगाई विधानसभा मतदारसंघावर अनेक वर्षांपासून अधिराज्य करत सर्वसामान्य मतदारांची दिशाभूल करून स्वतःचे साम्राज्य निर्माण करणाऱ्या प्रस्थापित कुटुंबाच्या प्रायव्हेट लिमिटेड मतदार संघाला जनाधाराच्या जोरावर कायमचा हादरा देण्यासाठी सज्ज झालेल्या माजी आमदार संगीता ठोंबरे यांनी सुप्त जनशक्तीच्या मदतीने आज अपक्ष उमेदवारी अर्ज दाखल केला असून, ठोंबरे ताईंच्या उमेदवारीसाठीचा भव्य दिव्य प्रतिसाद पाहून केज अंबाजोगाई विधानसभेच्या कुरुक्षेत्रावरील लढाईला आगळीवेगळी रंगत निर्माण होणार असल्याचे चित्र स्पष्ट झाले आहे.
याबाबतचा सविस्तर वृत्तांत असा की केज अंबाजोगाई विधानसभा मतदारसंघ हा एस. सी साठी राखीव आहे. या मतदारसंघावर गेल्या अनेक वर्षांपासून मुंदडा घराण्याचेच प्राबल्य राहिलेले आहे. स्वर्गवासी विमलताई मुंदडा यांनी प्रथम शिवसेनेतर्फे केज मतदार संघाची आमदारकी मिळवल्यानंतर परिस्थितीप्रमाणे त्यांनी ही वेळोवेळी पक्ष बदल केला परंतु,केज मतदार संघावरची सत्ता सोडली नव्हती. विमल ताईच्या नंतर काही काळ पृथ्वीराज साठे व भाजपाच्या संगीता ठोंबरे यांनी काही काळ केज मतदार संघाचा ताबा घेतला परंतु, पुन्हा पक्षाच्या बळावर मुंदडा कुटुंबाने आमदार नमिताताई मुंदडा यांच्या माध्यमातून केज मतदार संघावर आपले साम्राज्य प्रस्थापित केले. दोन टर्म च्या नंतर देखील आगामी विधानसभा निवडणुकीसाठी स्टॅंडिंग आमदार म्हणून आमदार नमिता मुंदडांना महायुतीतर्फे भाजपाने तिकीट दिल्यामुळे केज अंबाजोगाई मतदार संघावर पुन्हा मुंदडा कुटुंबाचेच प्राबल्य लादल्याची भावना संपूर्ण मतदारसंघात संचारली आहे.
आणि याचाच परिणाम म्हणून पर्यायी उमेदवार म्हणून माजी आमदार संगीता ताई ठोंबरे यांची उमेदवारी आज मोठ्या शक्ती प्रदर्शनाने तमाम मतदारांच्या आग्रहास्तव दाखल झाली असून, या शक्ती प्रदर्शनात सर्वच पक्षांचे पदाधिकारी कार्यकर्ते व प्रमुख मतदार सामील झाले असल्याचे दिसून आले. उमेदवारी अर्ज दाखल करतेवेळी संगीताताई ठोंबरे यांनी प्रसार माध्यमांशी बोलताना सांगितले की, अंबाजोगाई माझे माहेर व केज हे माझे सासर असल्यामुळे मतदार संघातील प्रत्येक प्रश्नाची आपणास जाणीव आहे व मतदारांच्या अडीअडचणी आपण व्यवस्थितपणे सोडवू शकतो हा मतदारांना विश्वास असल्यामुळेच मला अपक्ष उमेदवारी दाखल करण्याचा आग्रह मतदारांनी केल्यामुळे मी आज उमेदवारी दाखल करत असल्याची प्रतिक्रिया माजी आमदार संगीता ताई ठोंबरे यांनी माध्यमांशी बोलताना दिली.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
