बीड: बीडच्या पोलीस अधीक्षक कार्यालयातील सायबर शाखेतील वादग्रस्त निलंबित पोलिस उपनिरीक्षक रणजित कासले यास छत्रपती संभाजीनगरचे विशेष पोलिस महानिरीक्षक विरेंद्र मिश्र यांनी पोलिस खात्यातून कायमचे डीबारच नव्हे तर, डिसमीस केल्याचे आदेश काढल्याची काढल्याची माहिती बीडचे अपर पोलिस अधीक्षक सचिन पांडकर यांनी दिली आहे. रणजित कसले याच्यावर एका समाजाच्या विरोधात अपशब्द वापरल्याने अॅट्रॉसिटीचा गुन्हा दाखल झाला होता. त्यामुळे रणजीत कासले हा गुरुवारी रात्री उशिरा पोलिसांना शरण येणार असल्याची बतावणी त्याने व्हिडिओ मार्फत केली होती परंतू तसे न करता तो दिल्लीवरून विमानाने डायरेक्ट पुणे येथे येऊन तो पुण्यातील एका लॉजवर जावून झोपला. बीड पोलिसांना त्याचे लोकेशन समजताच आज सकाळी बीड पोलिसांनी त्याला पुणे येथील एका लॉज मधून ताब्यात घेतले. परंतू त्या आधीच गुरुवारी रात्री छत्रपती संभाजीनगरचे विशेष पोलिस महानिरीक्षक विरेंद्र मिश्र यांनी कासले याला पोलिस खात्यातून डिसमीसचे आदेश काढले होते. रणजित कासले हा सायबर शाखेत असताना विनापरवानगी आरोपीला घेऊन गुजरातमध्ये गेला होता. तेथे त्याने पैसे घेतल्याचा एक व्हिडिओ व्हायरल झाल्यावरून त्याला २६ मार्च रोजी बीडचे पोलीस अधीक्षक कावत यांनी निलंबित केले होते. त्यानंतर कसले याने दिशाभूल करणारे व ग्रह खात्याला बदनाम करणारे अनेक व्हिडीओ व्हायरल केले होते. यातील एकामध्ये त्याने एका समाजाबाबत आक्षेपार्ह विधान केले. या प्रकरणी बीडमधील एका वकिलाच्या फिर्यादीवरून १४ एप्रिल रोजी शिवाजीनगर पोलिस ठाण्यात ॲट्रॉसिटी ॲक्ट प्रमाणे गुन्हा दाखल झाला होता. त्यानंतर पोलिस रणजीत कासले च्या मागावर होते. परंतू तो सापडत नव्हता, उलट त्याने महाराष्ट्र पोलिसांना हिंमत असेल तर पकडून दाखवा, असे आव्हान दिले होते. परंतू गुरुवारी रात्री तो दिल्लीवरून पुण्यात आला. विमानतळावरच त्याने माध्यमांशी संवाद साधला. यावेळी त्याने पुन्हा एकदा सरकार आणि वरिष्ठ पोलिस अधिकारी यांच्यावर आरोप केले. धनंजय मुंडे आणि वाल्मीक कराड यांच्यावरही सडकून टिका केली. गुरुवारी सकाळी कासले याने सोशल मिडीयावरून काही रिल्स व्हायरल केल्या. यात त्याने ‘गब्बर इज बॅक’ असे लिहून चारचाकी वाहनाची स्पीड १५७ पर्यंत असल्याचे दाखविले. याच वाहनात त्याने आपली पोलीस उपनिरीक्षकाची टोपीही समोर ठेवल्याचे दिसत आहे. निलंबणानंतरही समोर टोपी ठेवून तो इतरांवर दबाव टाकण्याचा प्रयत्न करत होता. अॅट्रॉसिटीचा गुन्हा दाखल होताच स्थानिक गुन्हे शाखेचे पथक कासलेच्या मागावर धावले. परंतू त्यांनाही तो सापडला नाही. वेगवेगळे ठिकाण सांगून त्याने बीड पोलिसांना दोन दिवस चांगलेच घुमवले. गुरुवारीही तो शरण येणार असे, सांगितले होते, परंतू त्याने पुन्हा एकदा चकवा दिला. परंतू बीड पोलिसांनी पुण्यातील स्वारगेट परिसरातील एका लॉजमधून कासले याला सिने स्टाईलने ताब्यात घेतले.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
