शिक्षकाचा स्वाभिमान रस्त्यावर!मंत्रालयापासून उपसंचालक कार्यालयांपर्यंत फाईल्स दाबणाऱ्या अधिकाऱ्यांनो, जरा बघा :संतापलेल्या शिक्षकाचे औरंगाबादमध्ये ‘वस्त्रहरण’ आंदोलन आंदोलन आंदोलन.

शिक्षकाचा स्वाभिमान रस्त्यावर!

मंत्रालयापासून उपसंचालक कार्यालयांपर्यंत फाईल्स दाबणाऱ्या अधिकाऱ्यांनो बघा;

संतापलेल्या शिक्षकाचे औरंगाबादमध्ये ‘वस्त्रहरण’ आंदोलन!

बीड/विशेष प्रतिनिधी: ​राज्याच्या शिक्षण क्षेत्रातील संथ आणि असंवेदनशील कारभाराचे अत्यंत विदारक आणि धक्कादायक चित्र मंगळवारी छत्रपती संभाजीनगर येथे पाहायला मिळाले. आपल्या हक्काच्या सेवाज्येष्ठतेसाठी वर्षानुवर्षे प्रशासनाचे उंबरठे झिजवूनही न्याय न मिळाल्याने, संतप्त झालेल्या एका शिक्षकाच्या सहकाऱ्याने थेट विभागीय शिक्षण उपसंचालकांच्या दालनात अंगावरील कपडे काढून आंदोलन केले. या अभूतपूर्व आणि लज्जास्पद प्रकारामुळे शिक्षण क्षेत्रात प्रचंड खळबळ उडाली असून, प्रशासकीय दिरंगाईविरोधात तीव्र संताप व्यक्त केला जात आहे. ​या प्रकरणी शासकीय कामात अडथळा आणल्याप्रकरणी सिटी चौक पोलीस ठाण्यात पाच जणांवर गुन्हा दाखल करण्यात आला असून, मुख्य आंदोलकाला पोलिसांनी अटक केली आहे. ​दिरंगाईचा कळस: नेमके प्रकरण काय? ​बीड जिल्ह्यातील परळी वैजनाथ येथील ‘अभिनव माध्यमिक विद्यालयातील’ शिक्षक सदाशिव आत्माराम भोसले आणि गणेश देविदास भोसले हे गेल्या अनेक दिवसांपासून सेवाज्येष्ठता यादीत नाव समाविष्ट करण्याच्या कायदेशीर मागणीसाठी शिक्षण उपसंचालक कार्यालयाचे हेलपाटे मारत होते. सर्व अधिकृत कागदपत्रे आणि पुरावे सादर करूनही अधिकारी आणि लिपिक वर्गाकडून त्यांना फक्त ‘तारीख पे तारीख’ मिळत होती. ​मंगळवारी (७ जुलै २०२६) दुपारी हे शिक्षक सामाजिक कार्यकर्ते रमेश पाटील आणि इतर दोन तरुणांसह भडकलगेट परिसरातील विभागीय शिक्षण उपसंचालक कार्यालयात पोहोचले. ​अन् अधिकाऱ्यांच्या केबिनमध्येच कपडे उतरवले! ​मिळालेल्या माहितीनुसार, शिक्षक आणि त्यांचे सहकारी कार्यालयात आले तेव्हा शिक्षण उपसंचालक कैलास दातखीळ यांच्या दालनात दुसरी एक अधिकृत सुनावणी सुरू होती. त्यामुळे तेथील ५२ वर्षीय महिला कर्मचाऱ्याने त्यांना थोडा वेळ थांबण्याची विनंती केली. मात्र, प्रशासनाच्या वेळकाढू धोरणामुळे आधीच मानसिक त्रासात असलेल्या आंदोलकांचा संयम सुटला. ​त्यांनी महिला कर्मचाऱ्याशी हुज्जत घालत थेट उपसंचालकांच्या केबिनमध्ये जबरदस्तीने प्रवेश केला. अधिकारी आणि इतर कर्मचारी उपस्थित असतानाच, सामाजिक कार्यकर्ते रमेश पाटील यांनी प्रशासनाचा निषेध म्हणून अचानक अंगावरील सर्व कपडे (अंतर्वस्त्र सोडून) काढून टाकले आणि केबिनमध्ये जोरदार धिंगाणा घातला. या धक्कादायक आणि अनपेक्षित प्रकारामुळे केबिनमधील महिला कर्मचारी घाबरून बाहेर पळाल्या. ​व्हिडिओ सोशल मीडियावर व्हायरल; पोलिसांची तातडीने कारवाई ​आंदोलन सुरू असताना सोबत आलेल्या दोन तरुणांनी या संपूर्ण प्रकाराचे मोबाईलमध्ये व्हिडिओ शूटिंग केले आणि ते सोशल मीडियावर थेट लाईव्ह तसेच व्हायरल केले. हा व्हिडिओ वाऱ्यासारखा पसरताच शिक्षण वर्तुळात एकच खळबळ उडाली. ​घटनेची गांभीर्याने दखल घेत, शिक्षण उपसंचालक कार्यालयातील तक्रारीवरून छत्रपती संभाजीनगरच्या सिटी चौक पोलीस ठाण्यात पाचही जणांविरोधात विविध कलमान्वये गुन्हा दाखल करण्यात आला. पोलीस निरीक्षक रवींद्र सांगळे यांच्या पथकाने तातडीने चक्र फिरवून मुख्य आरोपी रमेश पाटील याला गुलमंडी येथील राहत्या घरातून अटक केली आहे. ​’पाठलाग’चा रोखठोक सवाल: जबाबदार कोण? ​संपादकीय मत: शासकीय कार्यालयात कपडे काढून आंदोलन करणे हे कायदेशीर आणि सामाजिकदृष्ट्या नक्कीच समर्थनीय नाही.

मात्र, ‘पाठलाग न्यूज’ या निमित्ताने थेट प्रशासनाला सवाल विचारत आहे— एका सन्माननीय शिक्षकाला किंवा त्याच्या पाठीशी उभे राहणाऱ्या कार्यकर्त्याला आपल्याच हक्काच्या कामासाठी इतक्या टोकाचे आणि आत्मक्लेशकारक पाऊल का उचलावे लागते? ​शालार्थ आयडी, पेन्शन, सेवाज्येष्ठता यांसारख्या फाईल्स महिनोनमहिने दाबून ठेवणाऱ्या आणि शिक्षकांना मानसिक विवंचनेत ढकलणाऱ्या ‘त्या’ जबाबदार अधिकाऱ्यांवर आणि कर्मचाऱ्यांवर शिक्षण विभाग कधी कारवाई करणार? की अशाच प्रकारे शिक्षकांचा स्वाभिमान रस्त्यावर येईपर्यंत प्रशासन झोपेचे सोंग घेणार? या संपूर्ण प्रकरणाची सखोल चौकशी करून शिक्षण व्यवस्थेतील ‘या’ अनागोंदी कारभाराला चाप लावण्याची गरज आहे.