धडाकेबाज कामगिरीची पावती! केजचे ‘कर्तव्यदक्ष’ पोलीस निरीक्षक स्वप्नील उनवणे यांची बदली रद्द; पुन्हा एकदा केज पोलीस ठाण्याचा पदभार स्वीकारणार.

धडाकेबाज कामगिरीची पावती! केजचे ‘कर्तव्यदक्ष’ पोलीस निरीक्षक स्वप्नील उनवणे यांची बदली रद्द; पुन्हा एकदा केज पोलीस ठाण्याचा पदभार स्वीकारणार.

​केज /प्रतिनिधी: बीड जिल्ह्यातील अत्यंत संवेदनशील आणि महत्त्वाचे पोलीस ठाणे असलेल्या केज पोलीस स्टेशनचे कर्तव्यदक्ष प्रभारी अधिकारी, पोलीस निरीक्षक श्री. स्वप्नील उनवणे साहेब यांची झालेली प्रशासकीय बदली अखेर रद्द झाली आहे. शासनाने आणि वरिष्ठ पोलीस प्रशासनाने त्यांच्या उत्कृष्ट कामगिरीची दखल घेत त्यांची पुन्हा एकदा केज पोलीस स्टेशनच्या प्रभारी अधिकारी पदी नियुक्ती केली आहे. या निर्णयामुळे केज तालुक्यातील कायदे-सुव्यवस्थाप्रेमी नागरिक, व्यापारी आणि सर्वसामान्य जनतेतून आनंद व्यक्त केला जात असून, गुन्हेगारांचे मात्र धाबे दणाणले आहेत. ​पोलीस निरीक्षक स्वप्नील उनवणे यांनी आपल्या कार्यकाळात केज पोलीस ठाण्याची सूत्रे हाती घेतल्यापासून तालुक्यात अवैध धंदे, गुन्हेगारी आणि कायदा व सुव्यवस्था बिघडवणाऱ्या घटकांवर वचक निर्माण केला होता. मागच्या चार-पाच दिवसांपूर्वीच प्रशासकीय कारणास्तव त्यांची केज येथून बदली करण्याचे आदेश निर्गमित झाले होते. मात्र, त्यांच्या कार्यकाळातील पारदर्शक आणि कडक शिस्तीच्या कारभारामुळे त्यांची बदली रद्द करून त्यांना पुन्हा एकदा केज पोलीस ठाण्याची जबाबदारी सोपवण्यात आली असल्याचे समोर आले आहे. ​उनवणे साहेब हे केवळ नावापुरते ‘कर्तव्यदक्ष’ नाहीत, तर त्यांच्या कार्यकाळातील काही प्रमुख कारवाईचे पुरावे खालीलप्रमाणे आहेत, ज्यावरून त्यांच्या निष्पक्ष कामाची पावती मिळते: ​स्वतःच्याच खात्यातील कर्मचाऱ्यावर दंडात्मक कारवाई: काही दिवसांपूर्वीच पोलीस ठाण्याच्या आवारात वाहतूक शाखेचा एक पोलीस हवालदार विना हेल्मेट दुचाकीवरून येत असल्याचे दिसताच, पीआय स्वप्नील उनवणे यांनी स्वतः पुढाकार घेऊन आपल्याच कर्मचाऱ्याला १,००० रुपयांचा ऑनलाईन दंड (E-Challan) ठोठावला होता. कायदा सर्वांसाठी समान असतो, हे त्यांनी आपल्या कृतीतून सिद्ध केले होते. या घटनेची जिल्हाभर चर्चा झाली होती. ​अनैतिक व्यवसायांवर कडक प्रहार: तालुक्यातील सारूळ फाटा येथील वादग्रस्त ‘रेणुका कला केंद्रावर’ लोकनाट्याच्या नावाखाली सुरू असलेल्या वेश्याव्यवसायाचा पर्दाफाश करत, जिल्हा पोलीस अधीक्षकांच्या मार्गदर्शनाखाली उनवणे साहेबांनी मोठी कारवाई केली होती आणि गुजरात राज्यातील पीडित महिलांची सुटका केली होती. ​दुसऱ्याच्या हद्दीतही धावून जाण्याची तत्परता (मानवतेचा पुरावा): युसुफवडगाव पोलीस स्टेशन हद्दीत सुकळी गावाजवळ झालेल्या भीषण ट्रक अपघातावेळी, आपल्या पोलीस ठाण्याची हद्द नसतानाही स्वप्नील उनवणे यांनी तातडीने रुग्णवाहिका, जेसीबी आणि अग्निशामक दल घटनास्थळी पाठवून जखमी चालकाचे प्राण वाचवण्यासाठी प्रशासकीय पातळीवर युद्धपातळीवर मदत केली होती. ​बसस्थानक परिसरातील चोऱ्यांचा तपास: केज बसस्थानकावर महिलांच्या दागिन्यांची चोरी करणाऱ्या आंतरजिल्हा महिला टोळ्यांचा माग काढणे आणि गुन्हेगारांवर वचक निर्माण करण्यात त्यांनी मोठी भूमिका बजावली आहे. तालुक्यातून अभिनंदनाचा वर्षाव: ​”सदरक्षणाय खलनिग्रहणाय” या महाराष्ट्र पोलिसांच्या ब्रीदवाक्याला जागून काम करणारे अधिकारी म्हणून स्वप्नील उनवणे यांची ओळख आहे. त्यांची बदली रद्द होऊन पुन्हा एकदा केज पोलीस स्टेशनला नियुक्ती झाल्याबद्दल संपूर्ण बीड जिल्ह्यातून आणि विशेषतः केज तालुक्यातील जनतेकडून, सामाजिक कार्यकर्त्यांकडून व पत्रकारांकडून त्यांचे खूप खूप अभिनंदन केले जात आहे. ​पाठलाग न्यूज परिवारातर्फे कर्तव्यदक्ष पोलीस निरीक्षक स्वप्नील उनवणे साहेब यांना त्यांच्या पुढील यशस्वी कार्यकाळासाठी आणि केज तालुक्यातील शांतता व सुव्यवस्था अबाधित ठेवण्याच्या कार्यास मनःपूर्वक व हार्दिक शुभेच्छा!