खाकी वर्दीला काळाकुट्ट डाग! बीडच्या अंभोऱ्यात रक्षकच बनला भक्षक; अत्याचार करणाऱ्या ‘त्या’ पोलीस अंमलदारावर निलंबनाची कुऱ्हाड!!

खाकी वर्दीला काळाकुट्ट डाग! बीडच्या अंभोऱ्यात रक्षकच बनला भक्षक; अत्याचार करणाऱ्या ‘त्या’ पोलीस अंमलदारावर निलंबनाची कुऱ्हाड!!

​ बीड/ क्राईम प्रतिनिधी : ज्यांच्या खांद्यावर समाजाच्या संरक्षणाची आणि कायद्याच्या अंमलबजावणीची जबाबदारी टाकण्यात आली आहे, त्याच पोलीस दलातील एका कर्मचाऱ्याने याच तालुक्यातील एका तरुणीचा विश्वासघात करून तिला वासनेची शिकार बनवल्याची धक्कादायक घटना उघडकीस आली आहे.अंभोरा पोलीस ठाण्यात कार्यरत असलेल्या या कर्मचाऱ्याच्या आशा काळ्याकुट्ट कृत्यामुळे संपूर्ण बीड जिल्ह्यात संताप व्यक्त होत असून, पोलीस प्रशासनाने या नराधम कर्मचाऱ्याला तात्काळ निलंबित करून त्याच्यावर कठोर कारवाईचा बडगा उगारला आहे. याबाबतचा सविस्तर वृत्तांत असा की, बीड आणि अहिल्यानगर च्या बॉण्ड्री वर असलेल्या ​अंभोरा पोलीस ठाण्यात पोलीस अंमलदार म्हणून कार्यरत असलेल्या भरत पोपट धोंडे याने एका २५ वर्षीय तरुणीशी ओळख वाढवून तिला प्रेमाच्या जाळ्यात ओढले. “तुझ्याशीच लग्न करणार” असे खोटे वचन देऊन त्याने पीडितेचा विश्वास संपादन केला आणि तिच्या असहायतेचा फायदा घेत वारंवार शारीरिक अत्याचार केले. मात्र, लग्नाचा विषय निघताच त्याने टाळाटाळ करत आपले रंग बदलले आणि लग्नास नकार देत पीडितेचा विश्वासघात करत तिची फसवणूक केली. आपली केवळ शारीरिकच नव्हे तर मानसिक आणि भावनिक फसवणूक झाल्याचे लक्षात येताच पीडितेने धाडसाने पोलिसांत धाव घेतली. ​पीडितेच्या तक्रारीवरून अंभोरा पोलिसांनी आरोपी भरत पोपट धोंडे याच्याविरुद्ध भारतीय न्याय संहितेच्या कलम ६४ आणि कलम ६९ लग्नाचे खोटे आमिष दाखवून केलेले शोषण अन्वये गुन्हा नोंदवला आहे. या प्रकरणाचा तपास अंभोरा पोलीस ठाण्याचे सहाय्यक पोलीस निरीक्षक मंगेश साळवे हे अत्यंत गांभीर्याने करत आहेत. ​घटनेचे गांभीर्य ओळखून आणि पोलीस दलाची प्रतिमा मलीन झाल्याची दखल घेत, बीडच्या पोलीस अधीक्षकांनी आरोपी भरत पोपट धोंडे याला तडका फडकी सेवेतून निलंबित करण्याचे आदेश दिले आहेत. तसेच त्याच्याविरुद्ध विभागीय चौकशी सुरू करण्यात आली असून, त्याला पोलीस दलातून कायमचे बडतर्फ करण्याची शक्यताही वर्तवण्यात येत आहे. या कारवाईमुळे पोलीस दलातील अशाच प्रकारची काळी कृत्य करणाऱ्यांना जरब बसणार आहे. ​ही घटना समाजासाठी दक्षतेची सूचनाआहे. रक्षकच जेव्हा भक्षक बनतो, तेव्हा सामाजिक सुरक्षिततेचा प्रश्न ऐरणीवर येतो. प्रेमाच्या किंवा लग्नाच्या नावाखाली जर कोणी अशा अज्ञान मुलींचे शोषण करत असेल, तर घाबरू नका, कायदा तुमच्या पाठीशी खंबीरपणे उभा आहे. अशाच प्रकारचा इशारा या प्रकरणातील कार्यवाही वरून दिसून येत आहे. ​ वर्दीतील पदाचा गैरवापर करून कोणाचे आयुष्य उद्ध्वस्त करणाऱ्यांना समाजात स्थान मिळता कामा नये. अशा गुन्हेगारांना कठोरातील कठोर शिक्षा होणे हीच पीडितेला खरा न्याय ठरेल. ​”पोलीस दल हे महिलांच्या संरक्षणासाठी कटिबद्ध आहे. या प्रकरणातील आरोपी स्वतः पोलीस असला तरीही त्याला कोणतीही सवलत दिली जाणार नाही. पीडितेला पूर्ण न्याय मिळेपर्यंत कायदेशीर प्रक्रिया सुरूच राहील.” असे आश्वासन बीडच्या पोलीस प्रशासनाने दिले आहे.