बीड जिल्ह्याला पुन्हा हादरा! केज घरकुल घोटाळ्याचे लोन विधीमंडळात;दोषींवर होणार थेट फौजदारी कारवाई!!
बीड: बीड जिल्ह्यातील केज नगरपंचायतीमध्ये ‘प्रधानमंत्री आवासच्या घरकुल योजने’त झालेल्या तब्बल ३.६२ कोटी रुपयांच्या उघड-उघड गैरव्यवहारामुळे संपूर्ण राज्यभरात एकच खळबळ उडाली असून, या प्रकरणाची गंभीर दखल घेत राज्य सरकारने आता कडक पावले उचलली असल्यामुळे , दोषी अधिकारी आणि बनावट कंत्राटदार बनलेल्या नगरपंचायत मधील कर्मचाऱ्यांना थेट तुरुंगाची हवा खावी लागणार असल्याचे स्पष्ट झाले आहे. विधीमंडळाच्या अधिवेशनात नगरविकास राज्यमंत्री माधुरी मिसाळ यांनी या घोटाळ्याबाबत मोठी घोषणा केली असून, केज अंबाजोगाई विधानसभा क्षेत्राच्या आमदार नमिता अक्षय मुंदडा यांनी लक्षवेधी सूचनेद्वारे हा प्रश्न लावून धरल्यानंतर सरकारने आपली भूमिका स्पष्ट केली. ”गरिबांच्या घरांसाठी असलेल्या निधीवर डल्ला मारणाऱ्यांना सोडले जाणार नाही. जिल्हाधिकाऱ्यांनी समिती गठीत केली असून ८ दिवसांत अहवाल प्राप्त होताच कडक फौजदारी कारवाई केली जाईल,” व घोटाळ्यातले पैसे व्याजासह वसूल केले जातील असे आश्वासन मिसाळ यांनी दिले. केज नगरपंचायत च्या घोटाळ्या संदर्भात सविस्तर माहिती अशी की,प्रधानमंत्री आवास योजनेतंर्गत (शहरी) केजमधील ३७४ लाभार्थ्यांसाठी केंद्र आणि राज्य सरकारकडून एकूण ५ कोटी ८६ लाख ४० हजार रुपयांचा निधी प्राप्त झाला होता. नियमानुसार हा निधी राष्ट्रीयीकृत बँकेत जमा करणे बंधनकारक असताना तो ‘महाराष्ट्र ग्रामीण बँकेत’ वळवण्यात आला. या निधीतून १ कोटी ६७ लाख ७५ हजार रुपये (११६ लाभार्थ्यांना). वितरित केले आणि उर्वरित ४ कोटी २८ लाख २५ हजार रुपयांपैकी मोठ्या रकमेचा कोणताही हिशोब, व्हाउचर किंवा बँक स्टेटमेंट उपलब्ध नसल्याचे प्राथमिक तपासात समोर आले आहे. सदरचा तपास आर्थिक गुन्हे शाखेकडून केला जात आहे. या व्यवहारातील गंभीर त्रुटी पाहता आता आर्थिक गुन्हे शाखेमार्फत (EOW) या प्रकरणाचा तपास वेगवान करण्यात आला आहे. गैरव्यवहार झालेली रक्कम व्याजासह वसूल करण्याचे आदेशही देण्यात आले आहेत. गरज भासल्यास या प्रकरणासाठी ‘विशेष तपास पथक’ (SIT) नेमण्याचा विचारही सरकार करत आहे. विधिमंडळातील या चर्चेत आमदार सुधीर मुनगंटीवार आणि हरिष पिंपळे यांनीही सहभाग घेऊन प्रशासकीय अनागोंदीवर ताशेरे ओढले. गरिबांच्या हक्काच्या घरावर डल्ला मारणाऱ्या “घोटाळा बहाद्दरांचे” धाबे दणाणले आहेत. येत्या ८ दिवसांत चौकशी समितीचा अहवाल आल्यानंतर कोणकोणत्या बड्या धेंडांवर गुन्हे दाखल होणार, याकडे संपूर्ण जिल्ह्याचे लक्ष लागले आहे.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
