बीड /विशेष प्रतिनिधी: बीड जिल्हा आणि परिसरात लाचखोरीच्या घटनांमध्ये दिवसेंदिवस चिंताजनक वाढ होत असल्याचं चित्र आहे. धक्कादायक बाब म्हणजे, स्थानिक लाचलुचपत प्रतिबंधक विभागाला (ACB) गुंगारा देणाऱ्या लाचखोरांवर आता बाहेरील जिल्ह्यातील एसीबी पथकांकडून कारवायांचा धडाका सुरू आहे. अशाच एका मोठ्या कारवाईत, आज गुरुवार (दि. २५ जून) रोजी जालना एसीबीच्या पथकाने बीड शहरात धडक कारवाई करत, शहर पोलीस ठाण्यात सापळा रचून एका पोलीस अंमलदाराला रंगेहात पकडले आहे. या कारवाईमुळे बीड पोलीस दलात प्रचंड खळबळ उडाली आहे. सुशेन प्रकाश उगले असे लाचखोर पोलीस अंमलदाराचे नाव असून, तो बीड शहर पोलीस ठाण्यात कार्यरत आहे. याबाबत मिळालेल्या माहितीनुसार, एका तक्रारदाराच्या कामाशी संबंधित असलेल्या भारतीय चलनक्षम लिखत अधिनियम (एन.आय. ॲक्ट – N.I. Act) कलम १३८ अंतर्गत नोटीस तामिल (बजावणी) करायची होती. ही नोटीस बजावण्याच्या मोबदल्यात संबंधित पोलीस कर्मचारी सुशेन उगले याने कायदेशीर काम करण्यासाठी तक्रारदाराकडे लाचेची मागणी केली होती. वारंवार होणाऱ्या या त्रासाला कंटाळून अखेर तक्रारदाराने याबाबत थेट जालना येथील लाचलुचपत प्रतिबंधक विभागाकडे (ACB) अधिकृत तक्रार नोंदवली. तक्रारदाराच्या अर्जावरून जालना एसीबीच्या पथकाने गुरुवारी बीड शहर पोलीस ठाणे परिसरात पंचांसमक्ष तक्रारीची पडताळणी केली. लाचेची मागणी सिद्ध झाल्यानंतर, पथकाने तात्काळ पोलीस ठाण्याच्या आवारातच अत्यंत गोपनीयतेने सापळा रचला. यावेळी पोलीस अंमलदार सुशेन उगले याला तक्रारदाराकडून लाचेची रक्कम स्वीकारताना जालना एसीबीच्या पथकाने रंगेहात ताब्यात घेतले. मूळ माहितीनुसार लाचेची रक्कम ८ ते १० हजारांच्या दरम्यान असल्याचं समोर आलं आहे. बीड शहराच्या मुख्य पोलीस ठाण्यातच थेट बाहेरील जिल्ह्याच्या एसीबी पथकाने येऊन केलेल्या या यशस्वी कारवाईमुळे जिल्ह्यातील लाचखोर अधिकाऱ्यांचे आणि कर्मचाऱ्यांचे धाबे दणाणले आहेत. या कारवाईनंतर संबंधित पोलीस अंमलदारावर गुन्हा दाखल करण्याची प्रक्रिया सुरू करण्यात आली आहे.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
