विकास की महाभ्रष्टाचार? केज तालुक्यात ४८ लाखांचा पूल ‘एका लाथेने’ कोसळला; ‘पाठलाग न्यूज’चा खळबळजनक खुलासा! ​मुरुमाऐवजी माती आणि सिमेंटऐवजी मुरूम! कंत्राटदार आणि अधिकाऱ्यांच्या युतीचा पर्दाफाश; राज्याला हादरवणारी बोगसगिरी.

विकास की महाभ्रष्टाचार? केज तालुक्यात ४८ लाखांचा पूल ‘एका लाथेने’ कोसळला; ‘पाठलाग न्यूज’चा खळबळजनक खुलासा!

​मुरुमाऐवजी माती आणि सिमेंटऐवजी मुरूम! कंत्राटदार आणि अधिकाऱ्यांच्या युतीचा पर्दाफाश; राज्याला हादरवणारी बोगसगिरी.

​केज / विशेष प्रतिनिधी: गल्लीपासून दिल्लीपर्यंत विकासाच्या गप्पा मारल्या जात असताना, प्रत्यक्षात मात्र जनतेच्या पैशांची कशी उघड्या नागड्या डोळ्यांनी लूट सुरू आहे, याचा एक धक्कादायक प्रकार बीड जिल्ह्यातील केज तालुक्यात समोर आला आहे. ज्या गावाने विकासाची कामे करून संपूर्ण राज्यात पहिला क्रमांक मिळवण्याचा बहुमान पटकावला, त्याच बनकरंजा गावातील विकासाची धिंडवडे काढणारा एक अत्यंत खळबळजनक व्हिडिओ सध्या सोशल मीडियावर व्हायरल झाला आहे. बनकरंजा ते चिंचपूर या रस्त्यावरील नदीवर बांधण्यात येत असलेला तब्बल ४८ लाख रुपयांचा पूल एका स्थानिक तरुणाने मारलेल्या साध्या लाथेने पत्त्याच्या बंगल्यासारखा कोसळला आहे. या एका लाथेने प्रशासकीय यंत्रणा आणि कंत्राटदारांच्या भ्रष्टाचाराची तटबंदी पार उद्ध्वस्त करून टाकली आहे. ​नांदेडच्या पुलाचा बोगस कारभार अवघ्या जगाने पाहिल्यानंतर आता खेड्यापाड्यातही हाच गोरखधंदा सुरू असल्याचे स्पष्ट झाले आहे. अत्यंत निकृष्ट दर्जाचे साहित्य वापरून हा पूल उभा केला जात होता. पुलाच्या बांधकामात मुरुमाऐवजी साधी माती आणि सिमेंटच्या काँक्रीटऐवजी निव्वळ मुरूम भरला गेल्याचे उघड झाले आहे. पुलाला जागोजागी भगदाड पडले असून नव्याने अंथरलेल्या नळ्याही फुटल्या आहेत. पहिल्याच मोठ्या पावसात हा अख्खा पूल वाहून जाण्याची भीती गावकऱ्यांनी व्यक्त केली आहे. काही जागृत तरुणांनी कंत्राटदाराच्या या भयंकर गुन्हेगारी स्वरूपाच्या बोगसगिरीचा पर्दाफाश केला आणि थेट व्हिडिओ सार्वजनिक बांधकाम खात्याच्या अधिकाऱ्यांच्या तोंडावर फेकला. ​या थरारक खुलाशानंतर निगरगट्ट प्रशासकीय अधिकाऱ्यांचे धाबे दणाणले आहेत. ‘दोन दिवसांत चौकशी करू’ असा जुनाच आणि गुळगुळीत निरोप पाठवून अधिकाऱ्यांनी आपली कातडी वाचवण्याचा प्रयत्न सुरू केला आहे. राज्यात सध्या खालपासून वरपर्यंत केवळ ‘कमिशनचे राज्य’ सुरू असल्याचा आरोप संतप्त नागरिकांमधून केला जात आहे. अधिकारी लोकप्रतिनिधींना जुमानत नाहीत, तर गुत्तेदार अधिकाऱ्यांना भीत नाहीत, अशी एकूणच अंधाधुंद परिस्थिति निर्माण झाली आहे. कोणाचेही कोणावर नियंत्रण राहिले नसून, जो कोणी या भ्रष्टाचाराविरोधात आवाज उठवेल, त्यालाच कोंडीत पकडण्याचे दडपशाहीचे राजकारण सुरू आहे. ​’पाठलाग न्यूज’चे तिखट सवाल: ​जनतेच्या करातून जमा झालेल्या ४८ लाख रुपयांवर डल्ला मारणारे हे महाभाग मोकाट का? ​लाथेने पूल पाडणाऱ्या तरुणाला दाद देण्याऐवजी लपवाछपवी करणारे अधिकारी कोणाचे पाठीराखे आहेत? ​हा केवळ निष्काळजीपणा नसून जनतेच्या जिवाशी खेळणारा ‘प्रशासकीय गुन्हा’ नाही का? ​या पुलाच्या बोगस कामाची उच्चस्तरीय चौकशी होऊन दोषी कंत्राटदार आणि संबंधित अभियंत्यांवर फौजदारी गुन्हे दाखल होईपर्यंत ‘पाठलाग न्यूज’ या प्रकरणाचा पाठपुरावा सोडणार नाही. जनतेच्या पैशांवर दरोडा टाकणाऱ्या प्रत्येक चेहऱ्याचा बुरखा टराटरा फाडणे हेच आमचे ध्येय आहे!