हाडांच्या ऑपरेशनमध्ये केवळ ‘खर्च‘ नव्हे, तर ‘अंतिम निकाल’ महत्त्वाचा: डॉ. सुरेश मुंडे यांचे आवाहन.
विशेष वृत्त बीड: अपघात किंवा इतर कारणांमुळे हाड फ्रॅक्चर झाल्यास अथवा हाडांचे ऑपरेशन करण्याची वेळ आल्यास नागरिक सहसा उपचाराचा खर्च आणि सरकारी योजनांचा लाभ या दोनच बाबींवर भर देतात. परंतु, पैशांपेक्षाही रुग्णाला मिळणारा अंतिम परिणाम (Outcome), सर्जनचा अनुभव आणि ऑपरेशननंतरची काळजी अधिक महत्त्वाची असते, असा मोलाचा सल्ला रेनुका मल्टिस्पेशालिटी हॉस्पिटलचे प्रसिद्ध ऑर्थोपेडिक सर्जन डॉ. सुरेश राजेंद्र मुंडे यांनी दिला आहे. बीड जिल्ह्यातील ग्रामीण व शहरी भागातील नागरिकांमध्ये जनजागृती व्हावी या उद्देशाने त्यांनी ही विशेष भूमिका मांडली आहे. ऑपरेशनपूर्वी डॉक्टरांना ‘हे’ प्रश्न नक्की विचारा! डॉ. मुंडे यांच्या मते, दवाखान्यात गेल्यावर नागरिकांनी उपचाराच्या खर्चासोबतच खालील महत्त्वाच्या मुद्द्यांवर डॉक्टरांशी संवाद साधला पाहिजे: हे ऑपरेशन केल्यानंतर रुग्णाला किती चांगला आणि सुरक्षित परिणाम मिळण्याची शक्यता आहे? हे ऑपरेशन कोणत्या अनुभवी तज्ज्ञ सर्जनकडून केले जाणार आहे? ऑपरेशननंतरची काळजी आणि पुनर्वसन (Rehabilitation) प्रक्रिया कशी असणार आहे? ऑपरेशननंतरची काळजी हीच उपचाराची खरी गुरुकिल्ली हाडाचे ऑपरेशन म्हणजे केवळ शस्त्रक्रिया करून रुग्णाला घरी पाठवणे नव्हे, असे सांगताना डॉ. मुंडे म्हणाले की, “ऑपरेशननंतरचे फिजियोथेरपी, डॉक्टरांच्या सूचनांचे काटेकोर पालन, योग्य विश्रांती आणि आहार हे पुढील एक ते दोन महिने अत्यंत आवश्यक असतात. तसेच पुढील ३ ते ४ महिने नियमित तपासणी आणि X-ray द्वारे हाड योग्य प्रकारे जुळत आहे की नाही, हे पाहणे तितकेच गरजेचे असते.” स्वस्त उपचारांपेक्षा योग्य उपचार पद्धतीला प्राधान्य द्या कित्येकदा केवळ मोफत किंवा कमी खर्चात उपचार मिळवण्याच्या घाईत योग्य तंत्रज्ञान, अनुभवी सर्जन किंवा शस्त्रक्रियेनंतरच्या काळजीकडे दुर्लक्ष केले जाते. याचा त्रास रुग्णाला पुढे अनेक वर्षे किंवा आयुष्यभर सहन करावा लागू शकतो. त्यामुळे समाजात “फक्त स्वस्तात उपचार नव्हे, तर योग्य उपचार आणि सर्वोत्तम निकाल” हा विचार रुजणे गरजेचे आहे. ”पैशांचा आणि योजनांचा प्रश्न नक्की विचारा, पण त्यासोबतच ‘माझ्या रुग्णाला सर्वोत्तम आणि सुरक्षित आरोग्य कसे मिळेल?’ हा प्रश्न विचारणे हीच जनजागृतीची पहिली पायरी आहे,” असे आवाहन डॉ. सुरेश मुंडे यांनी ‘पाठलाग न्यूज’च्या माध्यमातून नागरिकांना केले आहे.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
