‘एसीबी’चा महावितरणला पुन्हा मोठा ‘शॉक’; लाचखोर वरिष्ठ तंत्रज्ञ १ हजार रुपयांची लाच घेताना रंगेहात जाळ्यात!
बीड:दिनांक: १८ मे २०२६ बीड: सर्वसामान्यांचे शोषण करणाऱ्या आणि शासकीय योजनांचा लाभ देण्यासाठी हक्काची लाच मागणाऱ्या लाचखोरांना लाचलुचपत प्रतिबंधक विभागाने (ACB) पुन्हा एकदा जोरदार हादरा दिला आहे. ‘मागेल त्याला सौर कृषी पंप’ या अत्यंत महत्त्वाकांक्षी योजनेचे ना हरकत प्रमाणपत्र (NOC) देण्यासाठी एका शेतकऱ्याकडून अवघ्या १ हजार रुपयांची लाच घेताना महावितरणच्या एका वरिष्ठ तंत्रज्ञाला बीड एसीबीच्या पथकाने चिंचोली परिसरात सापळा रचून रंगेहात पकडले. या कारवाईमुळे महावितरण वर्तुळात प्रचंड खळबळ उडाली आहे. याबाबतची सविस्तर माहिती असेल की, कृष्णा आश्रुबा पाळवदे (वय ३३ वर्षे) असे रंगेहात पकडण्यात आलेल्या लाचखोर कर्मचाऱ्याचे नाव असून,पाळवदे हा तेलगाव येथील महावितरण कार्यालयात ‘वरिष्ठ तंत्रज्ञ’ (Senior Technician) म्हणून कार्यरत होता. शासनाच्या ‘मागेल त्याला सौर कृषी पंप’ या योजनेचा लाभ घेण्यासाठी एका जागरूक शेतकऱ्याने अर्ज केला होता. या पंपाच्या मंजुरीसाठी तेलगाव महावितरण कार्यालयाकडून ना हरकत प्रमाणपत्र (NOC) मिळणे आवश्यक होते. मात्र, आपले कर्तव्य चोख बजावण्याऐवजी वरिष्ठ तंत्रज्ञ कृष्णा पाळवदे याने हे प्रमाणपत्र देण्यासाठी तक्रारदाराकडे १ हजार रुपयांच्या लाचेची थेट मागणी केली. तक्रारदार शेतकऱ्याची लाच देण्याची अजिबात इच्छा नसल्याने, त्यांनी थेट लाचलुचपत प्रतिबंधक विभाग (ACB), बीड यांच्याकडे या छळाविरुद्ध रीतसर तक्रार नोंदवली. चिंचोली परिसरात रचला सापळा तक्रारीची शहानिशा केल्यानंतर बीड एसीबीच्या पथकाने आज, सोमवार दिनांक १८ मे २०२६ रोजी दुपारी ४:३० वाजण्याच्या सुमारास चिंचोली परिसरात अत्यंत गुप्ततेने सापळा रचला. ठरल्याप्रमाणे तक्रारदाराकडून १ हजार रुपयांची लाचेची रक्कम स्वीकारताच, दबा धरून बसलेल्या एसीबीच्या पथकाने झडप घालून कृष्णा पाळवदे याला रंगेहात ताब्यात घेतले. लाचलुचपत प्रतिबंधक विभागाच्या वरिष्ठ अधिकाऱ्यांच्या मार्गदर्शनाखाली बीड येथील पथकाने ही यशस्वी कामगिरी बजावली. या धडक कारवाईत खालील अधिकाऱ्यांचा व अंमलदारांचा समावेश होता: सोपान चित्तमपल्ले (पोलीस उपाधीक्षक, ACB बीड) समाधान कवडे * पांडुरंग काचगुंडे अनिल शेळके अविनाश गवळी गणेश मेहरे. या कर्मचाऱ्यांनी सापळा कारवाई पूर्ण केली. काही दिवसांपूर्वीच आष्टी येथे महावितरणच्या एका अधिकाऱ्याला लाच घेताना एसीबीने ‘शॉक’ दिला होता. ती घटना ताजी असतानाच आता बीड भागातील तेलगाव कार्यालयातील या कारवाईमुळे महावितरणमधील भ्रष्टाचाराची कीड किती खोलवर रुजली आहे, हे पुन्हा एकदा चव्हाट्यावर आले आहे. लाचखोर पाळवदे याच्यावर गुन्हा दाखल करण्याची प्रक्रिया सुरू असून, एसीबीच्या या कामगिरीचे सर्वसामान्य नागरिकांमधून कौतुक होत आहे.
हे पोर्टल मालक, प्रकाशक शिवदास मारोती मुंडे यांनी पाठलाग कार्यालय,"शिवशक्ती " पाण्याच्या टाकी जवळ, महात्मा फुलेनगर, केज जि.बीड(महाराष्ट्र) येथून प्रकाशित केले.(पोर्टल मध्ये प्रकाशित झालेल्या बातम्या संदर्भात संपादक, मालक सहमत असतीलच असे नाही. **कुठलाही वाद-विवाद केज न्यायालयाच्या कक्षेत.
