​ब्रेकिंग न्यूज:उध्या 28 जून रोजी होणारी टीईटी (TET) शिक्षक पात्रता परीक्षा ऐनवेळी पुढे ढकलली! प्रश्नपत्रिका गोपनीयतेचा भंग झाल्याने परीक्षा परिषदेचा मोठा निर्णय.

​ब्रेकिंग न्यूज:उध्या 28 जून रोजी होणारी टीईटी (TET) शिक्षक पात्रता परीक्षा ऐनवेळी पुढे ढकलली! प्रश्नपत्रिका गोपनीयतेचा भंग झाल्याने परीक्षा परिषदेचा मोठा निर्णय.

​विशेष प्रतिनिधी/पाठलाग न्यूज/ दिनांक: २७ जून २०२६ ​पुणे: महाराष्ट्र राज्य परीक्षा परिषदेमार्फत उद्या, म्हणजेच रविवार दिनांक २८ जून २०२६ रोजी संपूर्ण राज्यात आयोजित करण्यात आलेली शिक्षक पात्रता परीक्षा (TET) २०२६ ऐनवेळी रद्द करून पुढे ढकलण्यात आली असल्याचे पत्र महाराष्ट्र राज्य परीक्षा परिषदेने प्रसिद्ध केल्याने पुन्हा एकदा राज्य परीक्षा परिषदेच्या गुप्ततेवर प्रश्नचिन्ह निर्माण झाले आहे.

याबाबत समोर आलेला वृत्तांत असा की, भिवंडी येथे प्रश्नपत्रिकेतील काही प्रश्न परीक्षा सुरू होण्यापूर्वीच लीक झाल्याचे उघडकीस आल्यानंतर परीक्षा परिषदेने हा अत्यंत मोठा निर्णय घेतला आहे. यामुळे राज्यभरातील लाखो उमेदवारांना मोठा धक्का बसला आहे. ​भिवंडीत पोलिसांची पहाटेच धाड; गुन्हा दाखल– ​ परीक्षा परिषदेच्या अधिकृत पत्रानुसार, आज २७ जून २०२६ रोजी पहाटेच्या सुमारास भिवंडी येथे काही इसमांकडे टीईटी (TET) परीक्षेच्या प्रश्नपत्रिकेबाबत गोपनीय माहिती असल्याची खात्रीशीर माहिती भिवंडी पोलिसांना मिळाली होती. या माहितीच्या आधारे पोलिसांनी तात्काळ संबंधित ठिकाणी धाड टाकली.​यानंतर सखोल तपासणीसाठी महाराष्ट्र राज्य परीक्षा परिषदेच्या अधिकार्‍यांना तातडीने घटनास्थळी बोलवून घेण्यात आले. अधिकार्‍यांनी पडताळणी केली असता, त्या इसमांकडे सापडलेली माहिती आणि टीईटी जून २०२६ च्या मूळ प्रश्नपत्रिकेतील काही प्रश्न तंतोतंत समान असल्याचे आढळून आले. या गंभीर प्रकारानंतर भिवंडी पोलीस ठाण्यात तात्काळ गुन्हा नोंदविण्यात आला आहे. ​पारदर्शकतेसाठी परीक्षा पुढे ढकलली – आयुक्त ​NEET २०२६ परीक्षेमधील गैरप्रकार लक्षात घेऊन महाराष्ट्र राज्य परीक्षा परिषदेने आधीच सुरक्षिततेच्या सर्व उपाययोजना केल्या होत्या. मात्र, तरीही हा प्रकार समोर आल्याने परीक्षा परिषदेने कडक पाऊल उचलले आहे. ​”कोणत्याही परिस्थितीत परीक्षा पूर्ण पारदर्शकपणेच व्हावी हा परीक्षा परिषदेचा ठाम आग्रह आहे. या संपूर्ण प्रकरणाची सखोल चौकशी होणे गरजेचे असल्याने २८ जून रोजी एकूण १०२८ केंद्रांवर होणारी परीक्षा पुढे ढकलण्यात आली आहे.” ​पुढील तारीख वेबसाइटवर जाहीर होणार असल्याचेही पत्रकात म्हटले आहे. ​अचानक परीक्षा रद्द झाल्यामुळे उमेदवारांमध्ये संभ्रमाचे आणि संतापाचे वातावरण आहे. परीक्षा परिषदेने स्पष्ट केले आहे की, शिक्षक पात्रता परीक्षा (TET) बाबतची पुढील अद्ययावत माहिती आणि नवीन तारीख लवकरच परिषदेच्या अधिकृत वेबसाइटवर प्रसिद्ध करण्यात येईल.