संस्थाध्यक्ष, सचिव व मुख्याध्यापकांला अटक केल्याशिवाय मृतदेह ताब्यात न घेण्याचा नातेवाईकांचा निर्धार.

संस्थाध्यक्ष, सचिव व मुख्याध्यापकांला अटक केल्याशिवाय मृतदेह ताब्यात न घेण्याचा नातेवाईकांचा निर्धार.मराठवाडा : परभणी जिल्ह्याच्या मानवत  तालुक्यातील मंगरूळ येथील श्री नरसिंह प्राथमिक शाळेच्या सचिवाकडून आर्थिक फसवणूक आणि पिळवणूक केल्याप्रकरणी 35 वर्षीय शिक्षक सोपान पालवे यांनी सुसाईड नोट  लिहून आत्महत्या केल्याची धक्कादायक घटना समोर आल्यानंतर संबंधित संस्थेचे सचिव बळवंत खळीकर यांच्यावर गुन्हा दाखल करण्यात आला होता. मात्र, 24 तासानंतर ही सोपान पालवे यांच्या कुटुंबीयांनी त्यांचा मृतदेह ताब्यात घेतला नाही. जोपर्यंत या संस्थेचे अध्यक्ष धोंडीराम चव्हाण तसेच मुख्याध्यापक आणि संबंधितांना अटक होत नाही तोपर्यंत मृतदेह ताब्यात न घेण्याचा निर्णय त्यांच्या कुटुंबियांकडून घेण्यात आला आहे.

तसेच, पीडित कुटुंबीयांनी पोलीस  स्टेशनला जाऊन सविस्तर  फिर्यादही दिली आहे. आत्महत्याग्रस्त शिक्षक सोपान पालवे यांचा मृतदेह सध्या जिल्हा सामान्य रुग्णालयातच असून सर्व नातेवाईक आणि शिक्षकही जिल्हा सामान्य रुग्णालयात जमले आहेत. तत्पूर्वी त्यांनी पोलीस स्टेशनला जाऊन आरोपींच्या अटकेची मागणी केली. आरोपींना जोपर्यंत अटक होत नाही, तोपर्यंत आपण मृतदेह ताब्यात घेणार नसल्याचे नातेवाईकांनी म्हटलं आहे. परभणी जिल्ह्यातील मंगरूळ येथे नरसिंह प्राथमिक विद्यालयातील शिक्षकाने आत्महत्या केल्याची धक्कादायक घटना गुरुवारी समोर आली आहे. नरसिंह प्राथमिक विद्यालय मंगरूळ येथील सोपान शिवराम पालवे असे आत्महत्या केलेल्या शिक्षकाचे नाव असून त्यांनी गळफास घेऊन आपले जीवन संपवलं. आत्महत्येपूर्वी त्यांनी एक चिठ्ठी लिहून ठेवली असून, त्यात संस्थेच्या व्यवस्थापनावर गंभीर आरोप केले आहेत. संस्थाचालकाने आर्थिक पिळवणूक केल्याचे त्यांनी चिठ्ठीत म्हटलं आहे. तसेच, आपण शेती विकून 20 लाख रुपये संस्थाचालकास दिले होते, तरी, संस्थेच सचिव बळवंत खळीकर यांनी सातत्याने त्यांचा छळ केला. संस्थेत भरती करतांना शेत विकून त्यांनी 20 लाख रुपये सचिवाला दिले. त्यानंतर टप्पा अनुदान वाढवण्यासाठी ही 5 लाख रुपयांची मागणी करण्यात आली. एवढे पैसे देऊनही त्यांना वेळेवर पगार दिला जात नव्हता. कधी 20% नी पैसे मिळायचे कधी मिळायचेच नाही, त्यामुळे या त्रासाला कंटाळून त्यांनी आत्महत्या केल्याचं चिठ्ठीत म्हटलं आहे.  दरम्यान, परभणीच्या ग्रामीण पोलीस ठाण्यात सचिव बळवंत खळीकर यांच्यावर आत्महत्येस प्रवृत्त केल्या प्रकरणी गुन्हा दाखल करण्यात आला असून पालवे यांच्या कुटुंबीयांकडून खळीकर यांना अटक करण्याची मागणी करण्यात आलीय. दरम्यान, सध्या संस्थेचे अध्यक्ष धोंडीराम चव्हाण आणि सचिव बळवंत खळीकर फरार असल्याची माहिती समोर आली आहे.